Forleikur að Evrópusambandsaðild

Hugmynd Björns Bjarnasonar dómsmálaráðherra um samningsbundna upptöku evrunnar er góðra gjalda verð. Björn sýnir með þessu frumkvæði í Evrópuumræðu innan Sjálfstæðisflokksins. Öllu máli skiptir að horfa til framtíðar þegar kemur að tengslum Íslands við Evrópusambandið.

Evrópunefnd ríkisstjórnarinnar mun ræða hugmynd Björns Bjarnasonar. Forsætisráðherra hefur m.a. vísað þessari hugmynd til nefndarinnar. Eitt af meginhlutverkum Evrópuvaktarinnar er að kanna gaumgæfilega hvernig hagsmunum Íslendinga verður best borgið í framtíðinni gagnvart Evrópusambandinu. Og hugmynd Björns fellur vitaskuld undir það hlutverk vaktarinnar.

Verður rætt í Brussel
Evrópuvaktin mun einnig ræða leið Björns Bjarnasonar við forsvarsmenn Evrópusambandsins þegar við höldum til Brussel í september. Sjálfur hef ég hins vegar verulegar efasemdir um að þessi kostur teljist tækur, en hins vegar verður að fá endanlegt svar um þetta atriði eins og önnur.

Ég er hins vegar sammála orðum Ingibjargar Sólrúnar Gísladóttur, hingað til hefur afstaða Evrópusambandsins verið nokkuð afdráttarlaus og í sjálfu sér þarf ekki að koma á óvart að sambandinu hugnist lítt að þjóðir taki evruna upp bakdyramegin - hvort sem það er gert einhliða eða tvíhliða.

Þrýstingurinn stöðugt að aukast
Á endanum veltur þetta einfaldlega á því hvort að pólitískur vilji standi til þess að fara þessa leið hjá ESB. Er pólitískur vilji hjá Evrópusambandinu fyrir því að semja á þessum nótum við Íslendinga? Hvaða hag hefur ESB af því að semja með þeim hætti? Og er pólitískur vilji hjá Íslendingum að fara þennan millileik?

Í mínum huga er þessi hugmynd Björns Bjarnasonar millileikur. Ég spái því að þrýstingur frá samtökum atvinnurekenda sem og verkalýðshreyfingunni verði enn þyngri á næstu mánuðum og misserum og í sjálfu sér er það athyglisvert að þrýstingurinn á ESB aðild er stöðugt að aukast. Núverandi ástand er ekki boðlegt fyrir íslensk fyrirtæki og heimili.

Hagsmunamatið býður upp á opnun
Það er ekkert launungarmál að stjórnarflokkarnir vilja fara mismunandi leiðir í Evrópumálunum. En þó þarf að minnast þess að í Sjálfstæðisflokknum hefur spurningin um hugsanlega aðild að Evrópusambandinu verið sögð snúast hagsmunamat. Nú kann að vera að þetta mat á hagsmunum sé að breytast.

Þessi nálgun felur jafnframt í sér leið til að nálgast Evrópusambandsspurninguna á nýjan hátt, kalli hagsmunir Íslands á það. Hugmynd Björns Bjarnasonar birtist því mér sem forleikur að fullri aðild að Evrópusambandinu.

Náttröllin láta í sér heyra
Það vakti athygli mína að spurningin í íslenskum stjórnmálum lýtur ekki aðeins að því hvort hagsmunum Íslendinga sé best borgið með því að ganga í ESB eða standa utan þess. Vinstri græn kynna til leiks þriðju leiðina og af henni má ráða að flokkurinn er að festast í hlutverki nátttröllsins í íslenskri pólitík. Ögmundur Jónasson benti nýverið á þá leið að Ísland færi einfaldlega úr EES-samstarfinu. Með þessu útspili sínu sagði Ögmundur í Kastljósinu í gærkvöldi að hann ,,vildi dýpka umræðuna” og ,,fara nær skynseminni”. 

Þessi hugmynd Ögmundar getur þó hvorki talist skynsöm né djúp. Það vita allir sem eitthvað þekkja til þeirra kosta sem EES-samningurinn hafði í för með sér, með innri markaðinum og fjórfrelsinu, sem hefur haft grundvallarþýðingu fyrir atvinnulíf sem og íslensk heimili.

Vandséð er að greina kosti samfara þessari leið og læt ég Vinstri Grænum eftir að reifa þau sjónarmið. 

Athugasemdir

[Bjarni Kjartansson, 15.7.2008 kl. 13:48]

Sko Einar, ég er alls ekki neinn Kommi, það getur pápi þinn fullkomlega staðfest fyrir mína hönd.  Hinsvegar vil ég hyggja að, hvað þeir kvaka, sem vilja aðrar leiðir í villum.

Það ver gert vestra og var affarasælt.

Svo mun enn.

Svisslendingar fengu miklu miklu betri samning TVÍHLIÐA en við í EES bullinu.

Við ættum að skoða þá leið gaumgæfilega ÁÐUR en sleggjurnar falla í dómum.

Það gerði afi þinn.

Kratismi hefur hvurgi orðið til heilla, svo mikið er víst, þeir búa til stirð og leiðinleg Kerfi og leggja svo alla sína trú á þau.

Mér leiðist skoðunar þöggun, bæði hjá mínum mönnum og öðrum.

Það er allsendis óskoðað, að við fengjum ekki mun betri samninga og héldum enn meiri völdum um okkar mál en í inngöngu landráðum.

Það er nefnilega mín skoðun og mjög margra annarra, að EES samningurinn hafi jaðrar við drottinssvik og barði ég á hlustum Davíðs og Kjartans um þau efni með löngu og hrútleiðinlegu máli.

Læt hér lokið að sinni en berðu föður þínum kveðju mína frá Miðbæjarskólanum og feliri menntastofnunum og götulífinu í Vesturbænum og Miðbæ.

Miðbæjaríhaldið

[Gunnar Rögnvaldsson, 15.7.2008 kl. 14:48]

Sæll Ágúst Ólafur

Evrópumálum?

Ísland er í Evrópu, er það ekki?

Af hverju segið þið þetta ekki bara eins og það er og þá beint við ESB: hendið í okkur peningunum og látið okkur svo í friði!

Þetta er átakanleg umræða og sem undarlega ekki fór fram þegar "gengið", já gengið, var "hærra". ESB er ekki gjaldmiðill. ESB er félagsskapur 27 þjóða sem alltaf eru að verða fátækari og fátækari miðað við Ísland og Bandaríkin. Atvinnuleysi hér er núna 7,2% en er samt í sögulegu lágmarki. Atvinnuleysi ungmenna undir 25 ára aldri er 15%. Skattar sem hlutfall af heildar landaframleiðslu ESB eru komnir í 40% og fara hækkandi og ekki lækkandi. Þetta hlutfall er 29% á Íslandi.

Hinn innri markaður virkar ekki. Hann er kenning á pappír. 99,8% af öllum fyrirtækjum í ESB eru lítil, minni og millistór fyrirtæki (SME). Þau standa fyrir 81,6% af allri atvinnusköpun í ESB. Aðeins 8% af þessum fyrirtækjum hafa viðskipti á milli innri landamæra ESB. Aðeins 12% af aðföngum (inputs) fyrirtækjanna eru innflutt og aðeins 5% af þessum fyrirtækjum hafa viðskiptasambönd í öðru ESB-landi

Lissabon markmið ESB sem áttu að gera okkur hér í ESB að ríkasta og samkeppnishæfasta hagkerfi í heims árið 2010. Það stendur núna svona:

Þjóðartekjur á mann í ESB 2004 voru 18 árum á eftir tekjum í BNA

Þjóðartekjur á mann í ESB 2006 voru 21 árum á eftir tekjum í BNA

Þjóðartekjur á mann í ESB 2007 voru 22 árum á eftir tekjum í BNA

Framleiðni í ESB 2004 var 14 árum á eftir framleiðni BNA

Framleiðni í ESB 2006 var 17 árum á eftir framleiðni BNA

Framleiðni í ESB 2007 var 19 árum á eftir framleiðni BNA

Rannsóknir og þróun í ESB 2004 var 23 árum á eftir BNA

Rannsóknir og þróun í ESB 2006 var 28 árum á eftir BNA

Rannsóknir og þróun í ESB 2007 var 30 árum á eftir BNA

Atvinnuþáttaka í ESB er núna 11 til 28 árum á eftir BNA

Hafið þið enga sómakennd? Blekið er varla þornað á sjálfstæðisyfirlýsingu Íslenska Lýðveldisins. Það hefur aldrei í sögunni skeð að svo ríkt land sem Ísland nú er orðið, þökk sé frelsinu sem vannst árið 1944, hafi gengið í ESB. Aldrei! Öll þau lönd sem á undanförnum mörgum árum hafa gegnið í ESB hafa verið nánast gjaldþrota eða verið af flýja undan kommúnisma eða hálfgjaldþrota velferðarkerfum sem gátu ekki fjármagnað sig lengur.

Sum hin eldri og "ríku" lönd ESB eru að detta niður á skala OECD yfir ríkustu þjóðir í OECD. Á meðan þá hefur Ísland þotið framúr flestum af þeim. ESB er staðnað og situr fast, því fer aftur og hrakar hratt. Það er að verða fátækara miðað við sett markmið ESB og miðað við efnahag þegna á Íslandi og í Bandaríkjunum.

Ísland er alltof ríkt til að geta fengið nokkurn skapaðan hlut út úr ESB aðild. Nema ef væri mikið og landlægt atvinnuleysi áratugum saman, versnandi lífskjör, verra heilbrigðiskerfi, minni velmegun, minna lýðræði, minna frelsi, minni möguleika, minni velferð og meiri visnun á þeim virku vöðvum frelsisins sem hafa gert Ísland að ríkri þjóð. Sterkur framtíðarvilji og virkir vöðvar frelsisins munu alltaf visna í faðmi ESB því þeir verða notaðir minna og minna. Kassahugsun, nýlenduótti og þverrandi sjálfsábyrgð og framtíðarvilji mun setjast að í hjörtum Íslendinga.

Sósíal-demo-kratar og skriffinnar eru búnir að yfirtaka ESB. Þetta var í byrjun óskabarn íhaldsmanna og atvinnurekenda en er núna orðið óskabarn Sósíal-demo-kratar, embættimanna, kassamanna og áætlunargerðamanna með penna. Allir vita hvernig svona verk enda. Það þarf ekki annað en að kíkja í sögu svokallaðra "byltingarkenndra framfara" í Evrópu síðustu 100 árin. Hún var öll framkvæmd undir formerkjum SÓSÍAL

Bestu kveðjur

[Jóhann Pétur Pétursson, 15.7.2008 kl. 23:16]

Það kann að vera að sjálfstæðismenn spyrji sig hvaða hagsmunum verði fórnað þegar að gengið er í ESB. Samfylkingin hefur aftur á móti gert upp hug sinn. Hún er reiðubúin að fórna sjálfstæðum sjávarútvegi og landbúnaði í landinu. Þó svo að þú og félagi þinn ályktið í skýrslu Evrópunefndarinnar að Íslendingar muni halda óbreyttum veiðiréttindum um ókomna tíð í íslenskri lögsögu þá er sú ályktun hrein og klár ósannindi. Jú vissulega er það rétt að það eru til undanþágur frá þeirri meginreglu að öll nýting náttúrauðlinda eins og fiskistofna sé sameiginleg en þið hljótið að sjá að það eru undanþágur. Þess vegna getur sú staða komið upp að Evrópuþingið afnemi undanþágurnar og þá höfum við sannarlega glatað fiskimiðunum.

Eitt af óvissuþáttunum varðandi kostnað við ESB er hversu mikið dregið verður úr styrkjum við landbúnaðinn. Ríkisstjórn Íslands verður hreinlega hagur í því að draga styrkjum til atvinnugreinar sem að stendur nú þegar höllum fæti. Hvaða ályktun getur maður dregið aðra en þá að Samfylkingin sé einfaldlega sama um landbúnaðinn.

Hagsmunamat Samfylkingarinnar liggur alveg ljóst fyrir.  Ég vona að Sjálfstæðisflokkurinn haldi áfram að styðja hagsmuni þjóðarinnar, nú þegar Samfylkingin virðist vera reiðubúin að fórna þeim.

[Jón Halldór Guðmundsson, 16.7.2008 kl. 00:43]

Kæri Jóhann Pétur. Sjálfstæður sjávarútvegur, ertu ekki að grínast?

Hversu mikið verður dregið úr styrkjum til landbúnaðarins? Í fyrsta lagi styrkir ESB landbúnaðinn á ýmsan hátt og í annan stað langar mig til að vita hvort þú sért ekki fylgismaður sjálfstæðs landbúnaðar, fyrst þú ert fylgjandi sjálfstæðum sjávarútvegi?

[Valsól (IP-tala skráð) 16.7.2008 kl. 06:58]

Gunnar Rögnvaldsson talar um að skattar hér séu 40% í ESB miðað við 29% hér á landi. Ertu að kasta ryki í augu fólks? Eru skattar hér ekki 37% með útsvarinu? Ekki mikill munur.

Svo er skrýtið hvað menn eru fastir í því að vera á móti, er Davíðisminn enn að stríða ykkur? Sjálfstæðisflokkurinn leitar nú allra leiða til að breyta um skoðun og þið undirtátar flokksins eruð ekki að gera honum þetta léttara með endalausum Davíðisma. Það er reyndar gaman að sjá hvernig flokkurinn engist sundur og saman við tilburðina, því það vita allir hvert stefnir.

Kannski að þessi kreppa verði okkur Íslendingum til góðs, þ.e. að við göngum fyrr en ella inn í ESB,  

[Gunnar Rögnvaldsson, 16.7.2008 kl. 08:07]

Valsól -> lesa aftur

Skattar sem hlutfall af heildar landaframleiðslu ESB eru komnir í 40% og fara hækkandi og ekki lækkandi. Þetta hlutfall er 29% á Íslandi

Kveðja