Tímamót á þingi

Mikil tímamót áttu sér stað á Alþingi í dag. Þingheimur samþykkti að barnasáttmáli Sameinuðu þjóðanna yrði lögfestur. Með þessu mikilvæga skrefi verður Ísland eitt af fáum ríkjum heims sem lögfestir barnasáttmálann.

Barnasáttmáli Sameinuðu þjóðanna er einn af grundvallarsáttmálum mannkyns og munu réttindi íslenskra barna því aukast til muna við lögfestinguna. Þá munu íslenskir dómstólar þurfa að taka mið af barnasáttmálanum sem sett lög en dómaframkvæmd sýnir að barnasáttmálanum er sjaldan beitt hér á landi.

Málið fjallar einnig um endurskoðun í ljósi barnasáttmálans á allri löggjöf sem snertir börn hér á landi og erum við því að taka mikið framfaraskref með samþykkt þessa máls.

Þessi samþykkt er einnig viss tímamót þar sem hér er á ferðinni þingmannamál en ég flutti þetta mál fyrst fyrir þremur árum. Mér er það minnistætt þegar mér tókst fyrir nokkrum misserum að koma öðru þingmannamáli í gegnum þingið þegar við afnámum fyrningarfrest í kynferðisafbrotum gegn börnum. Þá settum við Ísland einnig í sérflokk þegar kemur að málaflokki barna og fjölskyldna.

Þessi tvö mál skipta miklu máli enda snerta þau grundvallarhagsmuni barna í okkar samfélagi. Ég get því yfirgefið þingið afar sáttur.

Athugasemdir

[Jónína Rós Guðmundsdóttir, 16.3.2009 kl. 19:37]

Til hamingju með þetta Ágúst Ólafur, þetta skiptir mjög miklu máli fyrir málefni barna á Íslandi.

 Og takk fyrir skeytið - mér þótti mjög vænt um það.  Hafðu það sem allra best

[Fritz Már Jörgensson, 16.3.2009 kl. 22:06]

Glæsilegur árangur Ágúst, vona að þú verðir sáttur á nýjum vettvangi.

[Guðmundur St Ragnarsson, 17.3.2009 kl. 00:42]

Gott mál Ágúst Ólafur. Þótt ég styðji ekki flokkinn þinn fannst mér þú beita þér virkilega vel í mörgum góðum málum. Gangi þér vel á nýjum vettvangi.

Kveðja,

Muggi.

[Baldvin Jónsson, 17.3.2009 kl. 10:11]

Gott fyrsta skref Ágúst Ólafur en af hverju að takmarka sig við lög? Af hverju ekki að stjórnarskrár binda sáttmálann?

Af hverju að takmarka sig við barnasáttmálann? Af hverju ekki að stjórnarskrár binda mannréttindasáttmálann?

Ég faga öllum jákvæðum skrefum, en finnst þetta lykta mjög sterkt af popularisma.

Hvað sem mér finnst um það per se, ber samt að fagna öllum undirtektum þingflokkanna við hrópum grasrótarinnar.

[Ingibjörg Hinriksdóttir, 17.3.2009 kl. 23:08]

Til hamingju Ágúst Ólafur og gangi þér vel á nýjum vettvangi. Geri samt ráð fyrir að þú verðir ekki langt undan.