Að rata heim

Fjölskyldan á Framnesveginum á 2 ketti. En þrátt fyrir að við eigum þessa tvo ketti þá er ég með ofnæmi fyrir þeim. Ég var reyndar talsmaður þess að fá þessi blessuðu dýr og því læt ég mig hafa það að taka eina pillu á dag. Þegar yngri dóttirin fæddist fyrir tæpum 2 árum voru uppi vangaveltur hvort hún hefði erft ofnæmisgen pabba síns. Og vegna þess ákváðum við þá að koma köttunum fyrir í pössun og fengu amman og afinn á Seltjarnarnesinu þann heiður að hýsa læðurnar.

Þetta er kannski ekki virði frásagnar nema einum sólarhringi síðar birtist annar kötturinn allt í einu heima. Hann hafði sem sagt labbað yfir allt Seltjarnarnesið og í gegnum allan Vesturbæinn og loks fundið lítið gult hús við Framnesveginn sem hann kannaðist við.

Þetta vakti auðvitað mikla furðu og jafnvel aðdáun á heimilinu. En kettirnir þurftu að vera í pössun í nokkra daga og voru því settir aftur í pössun og nú hjá hinni ömmunni og hinum afanum sem reyndar búa einnig á Nesinu. En læðan, Lína, endurtók leikinn og gekk heim, augljóslega mjög ósátt við þetta nýja fyrirkomulag.

Eftir þetta var nú ekki hægt að setja þær aftur í útlegð. Enda kom síðar í ljós að yngri dóttirin var ekki með ofnæmi og því lifa kettirnir núna góðu lífi á Framnesveginum og heimilisfaðirinn heldur áfram að taka eina pillu á dag.

Athugasemdir

[Gísli Hjálmar (IP-tala skráð) 2.3.2007 kl. 12:59]

Hvað er ein pilla fyrir blessuð börnin okkar ... góð frásögn.

Beztu kveðjur,

Gíslí Hjálmar

[Steinn (IP-tala skráð) 2.3.2007 kl. 13:59]

Þið vitið væntanlega að ofnæmi erfist ekki, heldur er áunnið. Sjálfur er ég með kattaofnæmi, en held samt 4 ketti.

[halkatla, 2.3.2007 kl. 14:29]

yndisleg saga - Lína er töffari ég dáist að fólki sem er með ofnæmi og á samt ketti - bravó! 

[Fanney Dóra Sigurjónsdóttir, 2.3.2007 kl. 18:27]

Það má því segja að þú sért á Pillunni Gústi!

[Dagbjört Hákonardóttir, 3.3.2007 kl. 00:19]

Hah, þetta er yndislegt! Ef einhver er sökker fyrir góðri kisusögu, þá er það ég. Meira svona. 

Ég myndi bjóðast til þess að passa dýrin þín, en ég veit ekki alveg hvernig Lína myndi höndla Kringlumýrarbrautina á leið sinni úr Kópavoginum yfir á Framnesveg :)

[Guðríður Haraldsdóttir, 3.3.2007 kl. 00:25]

Frábært!