Loksins heim

Það er mikið gleðiefni að Aron Pálmi skuli loksins vera orðinn frjáls maður. Fyrir utan hinn mannlega harmleik sem þetta mál er þá er það einnig mikill áfellisdómur yfir bandarísku dómskerfi. Hvernig getur siðmenntuð þjóð talið það vera réttlætanlegt að dæma einstakling í 10 ára fangelsi fyrir brot sem hann framdi þegar hann var 11 ára gamall? Enginn glæpur réttlætir slíkan dóm yfir barni.

Á sínum tíma beittu íslenskir embættismenn sér talsvert í málinu enda um íslenskan ríkisborgara að ræða. Bragi Guðbrandsson, forstöðumaður Barnaverndarstofu, fór meira að segja til Texas til að reyna að liðka fyrir málinu. Á þessum tíma var það einnig mat hlutaðeigandi að hugsanlegt væri hægt að beita pólitískum þrýstingi til að reyna að fá strákinn heim.

Þess vegna tók ég mál Arons Pálma upp á Alþingi 10. mars 2004 og kallaði eftir afskiptum utanríkisráðherra. Því miður báru þær tilraunir ekki árangur.

En nú er loksins sú stund runnin upp að Aron Pálmi getur um frjálst höfuð strokið. Það er einnig fagnaðarefni að sérstakur stuðningshópur hér á landi mun aðstoða Aron Pálma þegar hann kemur heim til Íslands.

Aron Pálmi frjáls maður

Athugasemdir

[Kristín Katla Árnadóttir, 19.8.2007 kl. 15:53]

Ég er svo  glöð fyrir hans hönd ég vona að allir Íslendingar taki honum vel.

[Guðrún Magnea Helgadóttir, 19.8.2007 kl. 16:44]

Vona að hann brjóti ekkert af sér hérna eftir heimkomuna... Hvern mann hann hefur að geyma vitum við ekki. "Malagafanginn", sem þjóðin ætlaði að ærast út af var fenginn til landsins en var til mikilla vandræða hérna svo vægt sé til orða tekið.

[Predikarinn - Cacoethes scribendi , 23.8.2007 kl. 02:02]

Já vonandi er hann góður og gegn borgari eftir refsivistina.  Hvað var það nákvæmlega sem hann var dæmdur fyrir upphaflega? Veit einhver nákvæmlega hvert brot hans var ?