Síðasta þingmálið mitt á kjörtímabilinu

Á þessu kjörtímabili hef ég lagt fram á Alþingi fjöldann allan af þingmálum. Allt frá aukinni vernd heimildarmanna fjölmiðla, líffæragjöfum, samfélagsþjónustu, óháðum rannsóknarnefndum, heimilisofbeldi og til auglýsinga heilbrigðisstétta svo eitthvað sé nefnt. En síðasta þingmálið sem ég lagði fram á þessu fyrsta kjörtímabili mínu var um lögfestingu á Barnasáttmála Sameinuðu þjóðanna.

Noregur hefur nú þegar lögfest Barnasáttmála Sameinuðu þjóðanna en annars eru aðildarríki samningsins, s.s. Ísland, einungis skuldbundin Barnasáttmálanum samkvæmt þjóðarrétti en ekki að landsrétti. Því þarf að lögfesta alþjóðalega samninga ef þeir eiga að hafa bein réttaráhrif hér á landi.

Að mínu mati á slíkur grundvallarsáttmáli að vera lögfestur hér á landi með sama hætti og Mannréttindasáttmáli Evrópu hefur verið lögfestur hér á landi. Við það fengið Barnasáttmálinn aukið vægi þar sem stjórnvöld og dómstólar landsins yrðu að taka mið af honum sem sett lög.

Laga ýmislegt í íslenskum lögum
Einnig er lagt til í þingmálinu að íslensk löggjöf verði aðlöguð betur að Barnasáttmálanum. Tryggja þarf betur friðhelgi einkalífs barna og sjálfsákvörðunarrétt þeirra í lögum s.s. í barnalögum, barnaverndarlögum og lögum um réttindi sjúklinga. Ákvæði barnasáttmálans geta sömuleiðis kallað á endurskoðun á hegningarlögum. Samkvæmt Barnasáttmálanum ber að aðskilja unga fanga frá fullorðnum föngum en hér á landi er það ekki gert.

Tryggja þarf í lög að rætt sé við yngri börn en nú er gert í umgengis- og barnaverndarmálum og að börn hafi samkvæmt grunnskólalögum ríkari rétt til að láta í ljós skoðanir sínar. Sömuleiðis þarf réttur barns til að þekkja foreldra sína að vera fyrir hendi og skoða hvort það eigi við ættleidd börn og í sæðisgjöfum. Huga þarf sérstaklega að stöðu barna sem glíma við langvarandi veikindi, fötlun, geðsjúkdóm, fátækt og barna nýbúa í íslenskum lögum.

Mér finnst þetta annars vera jákvætt mál og það er vonandi að það fari eins fyrir þessu síðasta þingmáli mínu og fór fyrsta þingmáli mínu sem var um afnám fyrningarfresta í kynferðisafbrotum gegn börnum.

Athugasemdir

[Eggert Hjelm Herbertsson, 26.3.2007 kl. 11:03]

Þú hefur staðið þig vel á þínu fyrsta kjörtímabili, vaxið í starfi og barist eins og sannur jafnaðarmaður fyrir okkar grunngildum. Haltu áfram á þessair braut.

kv

Eggert

[Páll Jóhannesson, 26.3.2007 kl. 11:51]

Duglegur strákur, og vonandi verður næsta kjörtímabil enn betra þjóðinni til heilla.

[Anna Ólafsdóttir (anno) (IP-tala skráð) 26.3.2007 kl. 13:31]

Áhugavert væri að vita meira um afdrif frumvarpsins um óháðu rannsóknarnefndirnar. Mér finnst við ennþá vera frekar „vanþróuð“ í þessum efnum miðað við þær þjóðir sem við helst viljum bera okkur saman.

[Inga Lára Helgadóttir, 26.3.2007 kl. 17:06]

Ég er ánægð með frammistöðu þína, til hamingju