,,...barnið getur kært það sem eftir er..."

Í Sunnudagskastljósinu var viðtal við Baugalín (Linda Drake) sem beitt var kynferðislegu ofbeldi þegar hún var barn. Viðtalið var mjög sláandi og hefur þá án efa snert taug hjá öllum þeim sem á horfðu. Þolendur kynferðislegs ofbeldis sýna ótrúlegt hugrekki með því að koma fram með sögu sína fyrir alþjóð og það er þeim að þakka að umræðan um þessi mál er talsvert opnari en áður. Það er einnig þeim að þakka að við höfum í sameiningu náð mikilvægum áföngum í baráttunni gegn kynferðislegu ofbeldi í okkar samfélagi.

Í ljósi hins gríðarlega mikilvægs áfanga sem náðist í þinginu á lokadegi þingsins um að afnema fyrningarfresti í kynferðisafbrotum gegn börnum langar mig að draga eitt fram sem Baugalín sagði í lok viðtalsins.

Hún sagði: "…um leið er gífurlegur fælingarmáttur í því gagnvart gerendum sem eru að hugsa svona,  þeir kannski síður gera það sem þeir hugsa ef þeir vita að barnið getur kært það sem eftir er." "…það er svo mikil vernd í þeim lögum fyrir börn."

Þetta er auðvitað hluti af kjarna málsins og því var þessi lagabreyting um afnám fyrningarfrests svo ótrúlega mikilvæg. Það er hins vegar ekki hægt að láta afnám fyrningarfresta í kynferðisafbrotum gegn börnum gilda fyrir brot sem eru nú þegar fyrnt. Þó er mikilvægt að hafa í huga að nýju fyrningarreglurnar gilda í þeim brotum þar sem fyrningarfresturinn er ekki nú þegar hafinn. Þ.e.a.s. ef þolandinn er nú undir 14 ára aldri eða brotin eru enn að viðgangast.

Athugasemdir

[Heiða Þórðar, 27.3.2007 kl. 09:45]

Tek heilshugar undir pistilinn

[Thelma Ásdísardóttir, 27.3.2007 kl. 10:08]

Ég fagna þessum nýju lögum um fyrningarfrestinn.  Ég hefði hiklaust kært mína ofbeldismenn hefðu brotin gegn mér ekki verið fyrnd.  Þó að litlar líkur hefðu verið á ákæru, svo ég tali nú ekki um dóm, þá hefði ég samt kært þó ekki hefði verið til annars en að staðfesta fyrir sjálfri mér, ofbeldismönnunum og fleirum að glæpir hafi verið framdir gegn mér.  Ég held líka að ef þolendum kynferðisglæpa sé gert mögulegt að kæra, gæti það leitt til aukningar á kærum sem aftur geta skilað sér sem þrýstingur á dómskerfið að endurskoða vinnslu þessara mála innan dómskerfisins.

[Sigurður Þór Guðjónsson, 27.3.2007 kl. 11:13]

Ég fagna þessum nýju lögum meira en orð fá lýst af sömu ástæðum og Linda og Thelma. 

[Páll Jóhannesson, 27.3.2007 kl. 12:53]

Góður pistill hjá þér Ágúst. Já vissulega hreyfði þessi Kastljósþáttur við manni svo um munar, og gerir reyndar alltaf, þegar svona sorgarsögur koma upp á yfirborðið. Vonandi verður öll þessi umræða til þess að hjálpa komandi kynslóðum að fyrirbyggja að svona harmleikir eigi sér stað.

[Jóhann Gunnar Gunnarsson, 27.3.2007 kl. 14:24]

Góður pistill hjá þér.

[Ásdís Sigurðardóttir, 27.3.2007 kl. 14:29]

Ég vil bara taka undir hrós til handa þolendum sem hafa lagt líf sitt að veði, með því að koma fram á sjónarsviðið og segja frá þeim hryllingi sem þeir hafa lent í.  Orð Lindu um- mikla vernd í lögunum- er slíkur sannleikur að engum nema þolenda er það fullkomlega ljóst hversu mikilvægt það er.

[Guðrún Þóra Hjaltadóttir, 27.3.2007 kl. 15:17]

Ef þú átt ekki skkilið Fálkaorðuna fyrir að koma þessu í gegn um þingið Ágúst Ólafur þá veit ég ekki hver á þá orðu skilið.

[Inga Lára Helgadóttir, 27.3.2007 kl. 21:29]

Ég er ánægð með þig Ágúst Ólafur

[Hjördis Gudlaugsdottir (IP-tala skráð) 31.3.2007 kl. 13:21]

Mikið er ég hamingjusöm með að þessi lög komust loksins í gegn.  Löngu tímabært   Er mjög sammála þér í þessum pistli þínum og tel að þessi lög auki vernd barna mjög ásamt því að hún eykur sjálfstraust og vald þeirra sem fyrir þessu hafa orðið.  Því nú er ekki valdið af þeim tekið að fá að kæra þegar þau komast á fullorðinsár.