Heilsubælið í Gervahverfi

Óttalega eru ríkisstjórnarflokkarnir að koma illa út þessari deilu sín á milli um auðlindamálin. Eins og venja er fyrir kosningar hefur stjórnarandstöðuflokkunum fjölgað um einn. Framsóknarflokkurinn, sem hefur verið í ríkisstjórn stöðugt síðan árið 1971 að 4 árum undanskildum, er kominn í stjórnarandstöðugírinn og hluti af þeirri vegferð er að pikka fight við Sjálfstæðisflokkinn.

Stjórnarslit!
Núna er það sjálfur stjórnarsáttmálinn sem er í húfi og hafa stór orð um afsögn ráðherra og stjórnarslit fallið. Auðvitað mun hvorugt gerast enda eru þessir flokkar límdir saman á mjöðmunum.

Framsóknarráðherrar hafa lýst digurbarkalega yfir óánægju sinni með framgöngu Sjálfstæðisflokksins í þessu máli og hótað stjórnarslitum. En þegar á hólminn er komið gerist lítið á Framsóknarbænum eins og venjulega enda eru þeir ekki vanir að standa við stóru orðin.

En Framsókn barðist ekki nóg...
Sjálfstæðismennirnir benda hins vegar á að Framsóknarmenn hafi ekki barist nægjanlega mikið fyrir þessu máli í stjórnarskrárnefndinni og þess vegna eigi nú kannski ekkert að uppfylla þennan hluta stjórnarsáttmálans sem lýtur að því að ,,ákvæði um að auðlindir sjávar séu sameign íslensku þjóðarinnar verði bundið í stjórnarskrá."

Lýðskrum í dag en stefna í gær
Og nú hefur þingmaður Sjálfstæðisflokksins komið sér í umræðuna og sagt að svona breytingar á stjórnarskránni væru nú bara lýðskrum. Bíddu nú við, er þetta sami þingmaður og sami flokkur sem lét setja þessi sömu orð í stjórnarsáttmálann og samþykkti? Var það ekki lýðskrum á þeim tíma? Hvað hefur eiginlega breyst?

Þessi vitleysisgangur á ríkisstjórnarheimilinu sýnir vel að þessi ríkisstjórn þarf einfaldlega frí enda ástandið farið að minna allverulega á Heilsubælið í Gervahverfinu. En það sem meira er, þjóðin þarf frí frá ríkisstjórninni.

Athugasemdir

[Tómas Þóroddsson, 6.3.2007 kl. 09:17]

Þeir sem eru fæddir 1953 hafa þá frá því þeir byrjuðu að kjósa aðeins verið lausir við framsókn í 4 ár. Þetta er viðbjóðslegt, ætli fólk geti ekki fengið skaðabætur frá evrópusambandinu.

[J Friðrik Kárason (IP-tala skráð) 6.3.2007 kl. 10:38]

Ágúst getur þú aldrei farið með réttar staðreyndir Frams. fllokkurinn er búinn að vera í stjórn í tæp 12 ár

[Ágúst Ólafur Ágústsson, 6.3.2007 kl. 11:17]

Sæll J. Friðrik Kárason. Þetta er nú bara hárrétt hjá mér og þú ættir nú bara að fara varlega í yfirlýsingarnar. Ég segi í pistlinum mínum að Framsókn sé búið að vera stöðugt í ríkisstjórn síðan 1971, 4 árum undanskildum! Og það er nú bara tilfellið.Nánar tiltekið hefur Framsóknarflokkurinn verið í ríkisstjórn síðan 13. júní 1971 fyrir utan nokkra mánuði milli okt 1979 og feb 1980 og síðan kjörtímabilið þegar Viðeyjarstjórnin var 1991-1995.Bestu kveðjur,Ágúst Ólafur

[Haukur Nikulásson, 6.3.2007 kl. 12:47]

Þetta auðlindamál er gegnheilt deilumál. Forysta Sjálfstæðisflokksins vill festa kvótann með lögum hjá útvegsmönnum. Framsóknarflokkurinn er á móti. Félagar LÍÚ hafa greitt tugi milljóna í flokkssjóðinn þeirra í gegnum árin. LÍÚ hefur þannig tangarhald á Sjálfstæðisflokknum alveg þangað til sá flokkur verður lagður niður vegna spillingarmála.