Stóra húsamálið

Þessa dagana er heilmikið rætt um skipulagsmál í borginni. Og sitt sýnist hverjum. Reyndar eru skipulagsmál sá málaflokkur sem ég tel að beri helst á góma þegar fólk vill ræða pólitík á mannamótum. Það er vegna þess að allir hafa skoðun á skipulagsmálum.

Án þess að leggja mat á framtíð þessara tilteknu húsa við Laugaveginn sem nú eru í umræðunni er ljóst að nokkrar leiðir eru uppi. Hægt er rífa húsin og byggja eitthvað algjörlega nýtt á reitnum. Svo er hægt að friða húsin og gera ekkert við þau. Þá er hægt að flytja þessi hús annað og byggja annars konar hús í staðinn. Loks er hægt að leyfa húsunum að vera þarna en byggja þau upp í anda liðinna tíma.

En annars fannst mér viðtal Egils Helgasonar við Sigmund Davíð Gunnlaugsson, fyrrverandi fréttamanns, á sunnudaginn var um þessi mál, vera afskaplega fróðlegt.

Ég hef heyrt af mörgum að útlegging Sigmundar hafi snúið mörgum á sveif með friðun þessara húsa, eða a.m.k. á þá skoðun að nýbyggingar á svæðinu þurfi að lúta ákveðnum kröfum um útlit fyrri tíma.

Athugasemdir

[Steinunn Þórisdóttir, 17.1.2008 kl. 20:42]

Mörg þessara húsa eru illa farin og mjög kostnaðarsamt að gera þau upp. En Laugavegurinn ber ekki stór hús þannig að það væri ákjósanlegast að halda heildarmyndinni, eða byggja hús sem líkust þeim sem fyrir eru.

[Guðrún Helgadóttir, 17.1.2008 kl. 21:58]

Niðurrif er óbætanlegur skaði og ég held að til lengri tíma litið muni það vera ávinningur fyrir höfuðborgina að fjármagn fari í að vernda það litla sem eftir er af gömlum húsum í miðborginni. Miðborgin er andlitið, í henni felst aðdráttaraflið til dæmis fyrir ferðafólk.

[Páll Geir Bjarnason, 18.1.2008 kl. 07:28]

Mér finnst afar eðlilegt að nýbyggingar í miðbæjarkjörnum lúti kröfum um útlit sem falli að heildarmyndinni. Áhugaverðastar eru þær raddir sem benda á stefnu borga erlendis, að rífa yngri hús sem þykja of framúrstefnuleg fyrir heildarmyndina sem þau eldri skapa og byggja í þeim stíl uppá nýtt. Ég get strax ímyndað mér nokkra slíka steypukassa í okkar ágætu borg.

Annars finnast mér Laugavegur 4 og 6 afskaplega ljót hús og sýnist þau handónýt í þokkabót. Væri nær að rífa þau eða flytja og byggja ný 3ja hæða hús í fallegum gömlum stíl í staðin. 

[Óðinn Þórisson, 18.1.2008 kl. 09:44]

Samkvæmt Þorgerði Katrínu mun ákvörðun hennar byggjast mikið á því að meirihlutinn komi fram með sína skoun á málinu en ekki eru nú miklar líkur á því og þá verður niðurstan væntanlega sú að uppbygging verði á lóðinni eins og r-listinn nýji og gamli hefur samþykkt. Verslunareigendur á laugaveginum vilja uppbyggingu þannig að ósamsæður meirihluti gæti verið lykillinn að því að eigendur sem eru með öll tilskylin leyfi fái að hefja uppbygginuna og verslunareigendur geti horft björtum augum til framstíðarinnar. Semsagt allir glaðir