Söngur og pólitík

Í gærkvöldi fór ég á stórtónleika sænsku söngkonunnar Karolu í Grafarvogskirkju. Tónleikarnir voru yndislegir en söngkonan eyddi talsverðum tíma í að spjalla við tónleikagesti um trúna og boðskapinn sem var auðvitað fróðlegt. Eins og flestir vita er Karola heimsfræg í Svíþjóð enda þekkt Júróvisjónstjarna.

Grafarvogskirkja hentaði ágætlega fyrir svona tónleikahald en reyndar hjálpaði til að söngkonan góða var dugleg að rölta út í salinn þannig að við sem sátum á aftari bekkjunum gátum ekki einungis heyrt í henni heldur jafnvel séð dívuna um tíma.

Annars finnst mér Grafarvogskirkja vera afskaplega falleg kirkja, sérstaklega að innan og er altarismyndin stórfengleg. Svo veit ég að séra Vigfús þykir hafa staðið sig gríðarlega vel í starfi enda einstaklega geðþekkur maður.

Tónleikarnir í gær voru því kærkomin upplifun. En þótt þinginu hafi lokið fyrir viku er alltaf eitthvað um fundi áfram þótt þessi vika hafi auðvitað verið rólegri en þær á undan. Ég held að ný ríkisstjórn Samfylkingar og Sjálfstæðisflokks geti vel unað við sitt þetta fyrsta haustþing.

Búið er að ákveða stórfelldar kjarabætur fyrir eldri borgara og öryrkja. Nýjir tónar hafa  heyrst í umhverfismálum og utanríkissmálum. Ákvarðanir um miklar samgönguúrbætur liggja fyrir og metnaðarfull lagafrumvörp á sviði skólamála hafa verið lögð fram. Þá hafa neytendamálin verið sett í forgang og eftirlitsstofnanir styrktar til muna. Málefni barna hafa sömuleiðis verið sett á oddinn og jafnréttismálin náð langþráðu flugi m.a. með jafnréttisfrumvarpinu sem var afgreitt út úr nefnd rétt fyrir jól.

En verkið er rétt að byrja og margt er enn ógert.

Athugasemdir

[Heimir Lárusson Fjeldsted, 21.12.2007 kl. 16:14]

Þakka þér læsilegan pistil

Þú segir m.a.: "Búið er að ákveða stórfelldar kjarabætur fyrir eldri borgara og öryrkja. "

Mig langar að vita í hverju "stórfelldar kjarabætur" fyrir öryrkja eru einkum fólgnar.

Ég skjólstæðing sem málið snertir.

[haraldurhar, 22.12.2007 kl. 02:02]

Sæll Ágúst.

     Tel að þingmenn samfylkingarnar, ættu að taka sig saman í andlitinu og hækka skattleysismörkin  yfir 200 þúsund,  og þegar þið hafið komið því í gegn þá er kannski tímabært að tala um stórfelldar kjarabætur.

[Heimir Lárusson Fjeldsted, 22.12.2007 kl. 19:33]

Enn vænti ég svara Ágúst Ólafur um "stórfelldar kjarabætur" til handa öryrkjum. Ég held jól með einum slíkum og var í dag að leggja í kostnað vegna hinna stórfelldu kjarabóta.

[Jón Halldór Guðmundsson, 23.12.2007 kl. 02:50]

Það er gott að óréttlætið brennur á mönnum. Eins og kemur fram hér á þessari síðu.

Ríkisstjórnin hefur komið mörgum góðum málum af stað og vonandi mörgum þeirra í höfn á næstu árum.

Meðal þeirra mála sem ég vildi sjá áherslu lagða á er einmitt hækkun skattleysismarka. Vonandi verða þau hækkuð hið fyrsta.

[Heimir Lárusson Fjeldsted, 23.12.2007 kl. 13:06]

Ekkert fréttnæmt af Framnesvegi?

[Valgerður Halldórsdóttir, 23.12.2007 kl. 17:24]

Gleðileg jól, með góðri kveðju frá Hafnarfirði

[Ingigerður Friðgeirsdóttir, 23.12.2007 kl. 23:45]

Gleðileg Jól.

[Gísli Hjálmar , 24.12.2007 kl. 11:37]

 

Ég vil óska þér og þínum gleðilegra jóla og gæfuríks komandi árs. Jafnframt þakka ég skemmtileg bloggviðkynni á árinu sem er að líða ...

kv, GHs

[Gunnlaugur Halldór Halldórsson, 29.12.2007 kl. 21:15]

Gleðileg jól og ár

Gulli Dóri

[Inga Lára Helgadóttir, 1.1.2008 kl. 15:33]

Gleðilegt ár Ágúst Ólafur

Kveðja,

Inga Lára