Ný undirstöðuatvinnugrein Íslands

Hér fyrir fyrir neðan má lesa grein sem birtist í Mogganum nýlega, um bisnesslífið, bankana og innrásina sem vantar.

"Ég tel að Ísland hafi eignast nýja undirstöðuatvinnugrein. Hér á ég við fjármálageirann. Hlutdeild fjármálafyrirtækja til landsframleiðslu, þ.e. verðmætasköpunarinnar, árið 2006 nam um 9,3% sem er talsvert meira en hlutdeild sjávarútvegsins sem var um 5,9% sama ár. Þetta er hæsta hlutfall sem þekkist á Norðurlöndunum og er hlutdeild íslenska fjármálageirans að nálgast sum sterkustu fjármálaríki heims eins og Bandaríkin og Bretland.

Í fyrsta skipti í Íslandssögunni vinna líklega fleiri núna í fjármálageiranum en í sjávarútvegi. Fjármálalífið stóð undir einum þriðja hluta þess hagvaxtar sem hefur verið undanfarin ár.

Fjölbreytilegra atvinnulíf en áður
Umfang bankastarfseminnar hefur gjörbreytt starfsmöguleikum Íslendinga. Fjármálafyrirtæki hafa fjölgað tækifærum fyrir ungt fólk en tæplega 8.000 manns vinna nú hjá íslenskum fjármálafyrirtækjum og sífellt bætist við. Sérhvert samfélag er í samkeppni við önnur samfélög um hæfa einstaklinga og því er mikilvægt að góðir kostir séu einnig í boði hér heima fyrir menntað fólk.

Bankarnir  bjóða upp á störf sem fela í sér ótal tækifæri fyrir almenning og þessi störf eru ekki lengur einskorðuð við Ísland heldur er starfvettvangurinn heimurinn allur. Hin öfluga útrás er meira og minna leidd af fólki sem hefur metnað og skynbragð á tækifæri.

Bankarnir hafa breytt íslensku atvinnulífi mikið hvað varðar fjölbreytni starfa, en í þessu sambandi verður einnig að hafa í huga störfin í þekkingariðnaði og hátækni.

Á íslenskum vinnumarkaði starfa um 160 þúsund manns en hjá íslenskum fyrirtækjum erlendis starfa nú um 200.000 manns, langflestir útlendingar. Þetta er ótrúleg breyting á tiltölulega fáum árum.

Stjórnarskrá atvinnulífsins
Stjórnvöld eiga að hlúa vel að viðskiptalífinu þannig að það fái að vaxa og blómstra. Það gerum við með því að búa þeim vinveitt umhverfi og góð vaxtarskilyrði.

Sömuleiðis er skynsamlegt að efla eftirlitstofnanir, s.s. embætti saksóknara efnahagsbrota, fjármálaeftirlit og samkeppniseftirlitið. Öflugt eftirlit með viðskiptum er lykillinn að trausti og trúverðugleika. Traust og trúverðugleiki er þungamiðja viðskiptalífsins.

Ég hef hrifist mjög af afstöðu Hæstaréttar Bandaríkjanna sem hefur kallað samkeppnislög stjórnarskrá atvinnulífsins. Það finnst mér rétt nálgun og það er engin ástæða fyrir atvinnulífið að óttast samkeppnisyfirvöld eða öflugt eftirlit.  Hagsmunir neytenda af öflugu eftirliti eru að sama skapi augljósir. Öflug samkeppni er kjarabarátta nútímans.

Innrás óskast
Staðreyndin er sú að það eru mörg tækifæri og spennandi möguleikar í íslensku viðskiptalífi um þessar mundir. Framsókn og útrás íslenskra banka er farin að vekja gríðarlega athygli og umfram það sem við Íslendingar hér heima gerum okkur oft grein fyrir.

En þótt útrásin gangi vel þá lætur innrásin standa á sér. Það er hlutverk okkar allra að skapa þær aðstæður að erlend fyrirtæki sjái kosti í því að starfa á Íslandi svo að tækifærunum fjölgi enn frekar og verðlag lækki."

Athugasemdir

[Bjarni Kjartansson, 29.6.2007 kl. 12:01]

Rétt er það hjá þér, að okkur sárvantar INNRÁS fyrirtækja.

Er með böggum Hildar yfir því, að þessi ofurgróði bankana er að mestu knúinn af þeim stærðum, sem venjulegir brauðstritarar eiga að greiða.

Svo skil ég ekki þessa svonefndu hagræðingu í versluninn hér hjá okkur.  Ef mér skjátlast ekki, eru margfallt fleirri fermetrar á hverja afgreiðslu en áður var.  Hvar er hagkvæmnin í því?

Þessvegna ber mönnum að fara varlega og hrapa ekki að neinu.

 Í þeim efnum vildi ég benda þingmönnum á, að snarlega þarf að samþykkja lög um fullveldisrétt þjóðarinnar yfir ÖLLUM auðlindum okkar.

Ef ekki væri hætta á, að útlendir menn, mis fullir góðsemi, eignuðust þær í gegnum fyrirtæki, sem hefðu eignarrét eða hálfgerðan eignarrétt á þeim.  Í verslun með fyrirtæki, hefur ítrekað orðið alger viðsnúningur í framkomu þeirra við viðskiptamenn sína, samanber orkufyrirtækin í BNA.  Stórgróðamenn eru nú farnir að tala um nauðsyn ,,heimamarkaðar" fyrir útrásarfyrirtækin. 

Það hljomar í eyrum fullorins Íhaldsmanns, sem veiðileyfi á notendur hérlendis til greiðslu ávöxtunarkröfu eigenda.

Miðbæjaríhaldið

frekar þjóðernissinnaður

[Haraldur Haraldsson, 29.6.2007 kl. 23:18]

Verslun og þjónusta og Fjarmagngeilin er meira fallvaltur en Fiskveiðar/hvað ef niðursveiflur verða og allt dregst saman þarna/Kaupi þetta ekki er þó Krati/Halli gamli,

[Hjörtur J. Guðmundsson, 29.6.2007 kl. 23:40]

Eitt megin þemað í málflutningi stuðningsmanna þess að Ísland verði hluti af Evrópusambandinu í seinni tíð hefur verið að reyna að gera sem allra minnst úr mikilvægi íslenzks sjávarútvegar fyrir þjóðfélagið. Málflutningurinn hefur einkum byggst á því að sannfæra fólk um að sjávarútvegur skipti svo litlu máli í dag að það þyrfti ekki að taka neitt sérstakt tillit til hagsmuna hans ef til þess kæmi að Ísland sækti um aðild að sambandinu. Ástæðan fyrir þessu er afar einföld. Íslenzkum Evrópusambandssinnum hefur ekki tekizt, þrátt fyrri áralangar tilraunir og jafnvel áratugalangar, að sýna fram á að hægt yrði að tryggja sjávarútvegshagsmuni okkar Íslendinga ef til Evrópusambandsaðildar kæmi. Þeir hafa nú greinilega gefizt upp á þeim tilraunum og því er þessi leið farin.

[Helga Auðunsdóttir, 3.7.2007 kl. 12:52]

Hef verið að bíða eftir þessari innrás lengi... og vonandi fer öll þessi útrás fjármálageirans að skila sér til okkar sem búum hér á landi.

[Baldur Kristjánsson (IP-tala skráð) 3.7.2007 kl. 19:52]

Þetta er öldungis rétt og auðvitað á efnahags- og atvinnustefnan að snúast um að byggja upp undirstöðutvinnuvegi framtíðarinnar, s.s. fjármálaþjónustu, hátækni- og þekkingariðnað og ferðaþjónustu - þar sem meirihluti starfa er áhugaverður og krefst menntunar.

Andstæðingar ESB-aðildar hugsa allt út frá gömlu undirstöðugreinunum þ.e. sjávarútvegi, landbúnaði og þungaiðnaði, og lifa enn á þeim tímum sem allt snerist um útvíkkun landhelginnar og næstu handstýrðu gengisfellingu krónunnar.