Bestu árin

Þeir eru margir sem halda því fram að menntaskólaárin séu bestu ár ævinnar. Á laugardagskvöld hitti ég marga góða vini og félaga úr Menntaskólanum í Reykjavík þegar við hittumst í tilefni af því að 10 ár voru liðin frá útskrift úr skólanum. Og það var ótrúlega skemmtilegt að hitta aftur bekkjarfélagana úr náttúrufræðideildarbekknum en suma þeirra hafði ég ekki hitt í mörg ár. Það var ekki síður skemmtilegt að heyra hvað fólk er að fást við. Eðli málsins samkvæmt eru þeir nokkrir læknarnir og verkfræðingarnir í bekknum og nokkrir sem enn eru erlendis í námi. Bekkurinn hefur líka verið nokkuð iðinn þegar kemur að barneignum.
 
Í upphafi kvöldsins voru höfð mörg orð um það hvað fólk hafði lítið breyst og við vorum eiginlega öll á því að bekkjarfélagarnir væri eins eftir öll þessi ár. En eftir að myndband var sýnt úr útskriftarferð árgangsins mátti glögglega sjá að sú fullyrðing átti ekki alveg við rök að styðjast. Þar mátti sjá fríðan en mjög barnalegan hóp, sem þó stóð sennilega í þeirri trú að mannskapurinn væri ekkert minna en rígfullorðinn. Áratug seinna hafa margir aðeins bætt á sig, fengið velmegunarvömb og einhverjir teknir að grána.
 
Baldvin Þór Bergsson fréttamaður á Ríkissjónvarpinu var ræðumaður kvöldsins og rifjaði upp góðar stundir úr MR. Ræða hans var góð og niðurstaða hans var einmitt sú að árin í Menntaskólanum væru líkast til með þeim skemmtilegri á ævinni.
 
Ég kunni alltaf vel við mig í MR. Mér finnst skólinn sjarmerandi og þær eru skemmtilegar hefðirnar sem þar lifa góðu lífi. Dætur okkar Þorbjargar hafa fengið mátulega hlutlaust uppeldi og Elísabet Una eldri dóttir okkar, sem nýlega er orðin 5 ára, sagði við okkur foreldrana um daginn: Áður en maður byrjar í Háskólanum, þá fer maður í MR.

Athugasemdir

[María Kristjánsdóttir, 4.6.2007 kl. 17:15]

Mér finnst einhvern veginn alltaf hræðilega sorglegt þegar ég heyri fólk segja að menntaskólaárin hafi verið bestu ár lífs þeirra- þó MR hafi ekki verið sem verstur.

[Óðinn Þórisson, 4.6.2007 kl. 19:46]

Takk fyrir að samþykkja mig sem bloggvin

Menntaskólaárin voru mjög skemmtilegur tími enda ekkert skelfilega leiðinlegt að sitja í 4.ár á skólabekk 90% stúlkur og 10% strákar þannig voru hlutföllin þá í Kvennó.

[Berglind Hermannsdóttir, 5.6.2007 kl. 20:59]

Ég var að klára 4. bekk Menntaskólans og ég er strax farin að hlakka til að fara á svona reunion..

MR er frábær valkostur og það er alltaf gaman í skólanum (misgaman að sjálfsögðu, en ávallt gaman)

Mbk

Berglind