Hvað ætlar ríkisstjórnin að gera fyrir börnin okkar?

Við í Samfylkingunni sögðum í kosningabaráttunni að málefni barna yrði sett í forgrunn ef við kæmust til valda. Við tefldum meira að segja fram sérstöku plaggi um það sem bar heitið Unga Ísland.

Í nýjum stjórnarsáttmála Samfylkingar og Sjálfstæðisflokks er tekið á þessu með myndarlegum hætti. Þar segir fyrst að “málefni yngstu og elstu kynslóðanna eru forgangsmál ríkisstjórnarinnar og hún mun leggja áherslu á að auka jöfnuð með því að bæta kjör þeirra hópa sem standa höllum fæti.”

Aðgerðaráætlun í málefnum barna
Svo stendur að ríkisstjórnin muni: ”beita sér fyrir markvissum aðgerðum í þágu barna og barnafjölskyldna á Íslandi. Í því skyni verði mótuð heildstæð aðgerðaáætlun í málefnum barna og ungmenna er byggist meðal annars á rétti þeirra eins og hann er skilgreindur í barnasáttmála Sameinuðu þjóðanna.”

Tannvernd barna
Í kosningabaráttuni lögðum við mikla áherslu á bætta tannvernd barna og það tókst að setja slíkt í sáttmálann sbr. “tannvernd barna verði bætt með gjaldfrjálsu eftirliti, forvarnaraðgerðum og auknum niðurgreiðslum á tannviðgerðum barna.”

Námsgögn í framhaldsskólum
Þá börðumst við fyrir ókeypis bókum fyrir framhaldsskólanemendur og í stjórnarsáttmálanum er það sett inn með víðtækari hætti þar sem segir að "nemendur í framhaldsskólum fái stuðning til kaupa á námsgögnum" enda eru það ekki bara bækur sem íþyngja nemendum fjárhagslega.

Langveik börn, biðlistar, foreldraráðgjöf og forvarnir
Mörgum efnisatriði í Unga Íslandi sem rötuðu í stjórnarsáttmálann erum við sérstaklega stolt af. Þar segir m.a. að “sérstaklega verði hugað að stuðningi við börn innflytjenda í skólakerfinu. Jafnframt verði aukinn stuðningur við langveik börn, börn með hegðunarvandamál, geðraskanir og þroskafrávik.

Þegar í stað verði gripið til aðgerða til að vinna á biðlistum á því sviði. Hugað verði að foreldraráðgjöf og –fræðslu. Forvarnastarf gegn kynferðislegu ofbeldi verði eflt og stuðningur við fjölskyldur ungmenna, sem eiga í vanda vegna vímuefnaneyslu, aukinn.”

Að lokum vil ég draga fram tvo mikilvæga punkta til viðbótar út úr stjórnarsáttmálanum. Ein þeir eru að “fæðingarorlofið verði lengt í áföngum” og “barnabætur verði hækkaðar til þeirra sem hafa lágar tekjur”.

Athugasemdir

[Þórbergur Torfason, 24.5.2007 kl. 10:29]

Sæll Ágúst. Miðað við þær efndir sem orðið hafa nú þegar á kosningaloforðum ykkar, er ekki bjart yfir þessum lista sem þú tilgreinir hér. Nýbyrjaður utanríkisráðherra hóf ferilinn með glæsilegum svikum á gefnu kosningaloforði loforði sem hún margítrekaði í baráttunni bæði á fundum og í sjónvarpsviðtölum. Það er ekki mikið gleðiefni fyrir foreldri sem á fjögur börn á faraldsfæti um heiminn hafandi hlustað á nýkrýndan utanríkisráðherra lofað margoft að kæmist hún í aðstöðu til, skyldi hún afmá nafn lands okkar af lista hinna viljugu þjóða. Ég bara spyr sem einn af vinnuveitendum ykkar, er þetta bara byrjunin á sviknum loforðum ykkar í ríkisstjórn? Þarf þjóðin að skrifa uppsagnarbréf ykkar strax í fyrstu viku ykkar í starfi. Hverskonar framferði er þetta eiginlega við kjósendur. Í hvaða tilgangi haldið þið að þið hafið verið kosin? Þið fenguð atkvæði út á kosningaloforð ykkar og málflutning það hljótið þið að skilja, ekki svikin loforð. Á svo kannske að fara eins að með eftirlaunalögin? Á semsagt bara að bulla.

[Björg F (IP-tala skráð) 24.5.2007 kl. 13:10]

Til hamingju, mikið er það nú hressandi að fá ferska vinda inn í ´nýja ríkisstjórn. Nýjir vendir sópa best.. það hefði verið óskandi ef Geir hefði skoðað sitt val aðeins betur..

En mér líst vel á stefnuskrá ykkar þó það vanti sárlega ákv. mál í sambandi við sjávarútvegsmál, kvótan og þessar fáránlegu hvalveiðar á auðvitað bara að hætta með núna..

[Gísli Hjálmar , 24.5.2007 kl. 18:31]

Flott blogg Ágúst ...

[Elías Theódórsson, 24.5.2007 kl. 21:06]

"Í samræmi við þá grundvallarreglu að fé fylgi barni áréttar landsfundur að engu skipti hvort sá styrkur fari til opinberra aðila, einkaaðila eða til heimilisins sjálfs." (Fá stefnu Sjálfstæðis-manna sem samþykkt var á síðasta landsfundi.)

Nú þarf bara að koma þessu í framkvæmd svo foreldrar hafi raunverulagt val varðandi uppeldi barna sinna og geti aukið samvistir sínar með börnum sínum

[Hafsteinn Viðar Ásgeirsson, 24.5.2007 kl. 21:17]

Góð skrif og lofandi, til hamingju með stjórnina og árangurinn, þetta lofar góðu...

[Inga Lára Helgadóttir, 24.5.2007 kl. 23:41]

Nú er okkur námsfólki með börn loksins borgið