2 samviskuspurningar

Mikið var ég ánægður með mitt fólk í sjónvarpinu í kvöld. Jóhanna Sig sýndi sína góðu takta og sannar að það stenst hana enginn snúninginn þegar kemur að velferðarmálunum. Þar er hún einfaldlega á heimavelli og í algjörum sérflokki. Björgvin var einnig mjög góður í umræðum um menntamálin, enda hefur hann lagt ríka áherslu á þau og er mjög öflugur í þeim málaflokki eins og öðrum.

Þessir tveir málaflokkar birta vel nauðsyn þess að skipta hér um ríkisstjórn. Ríkisstjórnin hefur einfaldlega staðið sig illa í velferðarmálunum og hefði auðveldlega getað gert mun betur í menntamálum. Það sýnir samanburður á framlögum til grunnskólans, sem sveitarstjórnir landsins reka, og svo framlag til háskóla- og framhaldskólana sem ríkið rekur.

Kjósendur þurfa að svara a.m.k. tveimur grundvallarspurningum fyrir kosningar.

Sú fyrri er hvort að fólk vilji ríkisstjórn sem er ábyrg fyrir því að Ísland er í 21. sæti af 30 helstu iðnríkjum heims þegar kemur að opinberum útgjöldum í háskólana og hvort að fólk sé sátt við það að Ísland sé í 16. sæti þegar borin eru saman opinber úgjöld til framhaldsskóla.

Sú síðari varðar velferðarmálin og aðbúnað aldraðra. Vill fólk ríkisstjórn sem er ábyrg fyrir því að um 400 eldri borgarar eru í brýnni þörf eftir hjúkrunarrýmum og um 1.000 eldri borgara eru í þvingaðri sambúð með kolókunnugu fólki? Munum að það eru fjölmörg dæmi um eldri hjón sem hafa verið aðskilin á ævikvöldi sínu vegna skorts á búsetuúrræðum en þau eru á ábyrgð ríkisstjórnarinnar.

Athugasemdir

[Úlfar Þór Birgisson Aspar, 25.4.2007 kl. 08:55]

Sæll Ágúst,já ég horfði á þáttinn í gær með öðrum verkum mínum,og vissulega stóð Jóhanna sig vel eins og alltaf enda loks hennar tími kominn vona ég,og varðandi 16 sætið er það bara gamalt eurovision sæti sem við kærum okkur ekkert um aftur :) gangi ykkur allt í haginn.

kv.Úlli.

[Kalli (IP-tala skráð) 25.4.2007 kl. 10:22]

Það sem var áhugavert er að fylgjast með því hvernig Samfylkingarfólk keppist við að segja hvaða mál sé í fyrsta sæti hjá þeim.

Fagra Ísland, Unga Ísland, Velferð, Aldraðir, Menntun og Samgöngur.  Allt er þetta hæsta forgangsmál fyrir Samfylkinguna, og allt eftir því hvað umræðuefnið er hverju sinni (og skoðanakannanir segja).  Og aldrei er sagt hvernig eigi að borga. 

Hvernig geta allir stærstu kostnaðarliðir ríkisins verið í fyrsta forgangi?  Einhver er að ljúga.

Þessi hringlháttur ykkar í skoðunum veldur því að ykkur skortir allan trúverðugleika.

[Anna Einarsdóttir, 26.4.2007 kl. 11:54]

Ég held Kalli að þú sért nú búinn að gleyma til hvers ríkið var upphaflega stofnað.  Því var ætlað að sjá til þess að löndum þínum væru tryggð mannsæmandi kjör, heilbrigðisþjónusta og menntun... auk vegagerðar o.þ.h.  Upphaflegt markmið var ekki að eiga rosa flott sendiráð út um allt, byggja "bráðnauðsynleg" Héðinsfjarðargöng osfrv.  Gæti skrifað ritgerð um bruðl núverandi ríkisstjórnar.

Það eruð þið sem hafið glatað trúverðugleika með forgangsröðun ykkar.