Leynivinir þingmanna

Allir þingmenn eiga sér leynivin þessa dagana (og þá á ég ekki við hefðbundna fjárhagslega bakhjarla þingmanna). Ég er hér að tala um alvöru leynivin á þingi sem á að gleðja annan þingmann með einhverjum hætti. Það er Samfés sem eru samtök félagsmiðstöðva sem stendur fyrir þessum leik á meðal þingmanna.  Ég hef hins vegar heyrt að sumir þingmenn hafa verið tregir til þátttöku í ljósi þess hvaða leynivin þeim var úthlutað. Svona getur pólitíkin stundum verið.

Leynivinur minn er hins vegar búinn að vera gjöfull. En um daginn kom ég inn á skrifstofu mína og fann fallega innpakkaða rauðvínsflösku. Og í dag mátti ég finna glæsilegan tepoka og einhverja gasalega flotta tegræju í hólfinu mínu í Alþingishúsinu.

En sá sem ég á að gleðja er í háttvirtri landbúnaðarnefnd og í því ljósi ákvað ég að senda á skrifstofu hans rammíslenska osta. Reyndar komst ég áðan að því að þessi leynivinur minn verður erlendis í viku þannig að ostarnir á skrifborðinu hans ættu bara að batna á meðan.

Annars verður tilkynnt um leynivin minn og fleiri þingmanna í Kastljósi í kvöld. Spennan í samfélaginu hlýtur að vera orðin gríðarleg.

Athugasemdir

[Haukur Nikulásson, 23.2.2007 kl. 15:25]

Þetta er gott framtak hjá krökkunum. Þau þurfa ekki að fylgjast lengi með þingfundum til að sjá að þingmenn megi vera vinsamlegri hver við annan svo varlega sé tekið til orða.

[Eva Kamilla Einarsdóttir, 23.2.2007 kl. 15:33]

hahaha....en krúttulegt og ekki erfitt að ímynda sér að það reyni fólki misauðvelt að taka þátt, mér detta alla vega strax í hug nokkur "vinapör" sem gaman væri að sjá hvernig kæmu út.

[JB (IP-tala skráð) 23.2.2007 kl. 15:51]

ObbObb - Leynivinir eiga að vera leynilegir!! - nú ertu búinn að svifta hulunni af þér, með því að segja hverjum þú gefur og hvað!!