Kosningabarátta sem segir sex

Það er einn sjónvarpsþáttur sem hefur lengi verið í miklu uppáhaldi hjá mér.

Þetta er kannski ekki sérlega frumlegt val hjá mér, verandi stjórnmálamaður maður sjálfur, en minn uppáhalds sjónvarpssþáttur er The West Wing eða Vesturálman eins hann heitir upp á ástkæra ylhýra.

Eins og flestir lesendur sjálfsagt vita þá eru þetta dramaþættir um bandarísk stjórnmál. Og það er jafnan mikill hasar hjá mínum mönnum í USA. Reyndar verð ég að viðurkenna að sumt fer fyrir ofan garð og neðan hjá mér sem gerist í þessum þáttum. Sögupersónurnar eru allar svo klárar og orðheppnar að það talar helst ofan í hvert annað og iðulega í hálfkveðnum vísum. En þetta heldur manni engu að síður föstum og það er gaman að þykjast skilja hugarheim bandarískra spindoktora og harðsvíruðu lobbyhópanna sem þar ráða ríkjum.

Ég hef tekið eftir því að þegar ég tek ástfóstri við eitthvert sjónvarpsefni þá finnst mér best að horfa á nokkra þætti í röð. Má segja að maður leggist á beit.

Eftir að ég lauk við sjöttu seríu Vesturálmunnar í síðustu viku hef ég nú með harðfylgi náð að redda mér sjöundu seríu. Þannig að nú sitjum við hjónin upp í sófa kvöld eftir kvöld og horfum á lokaævintýri Josiah Bartlet og félaga í Hvíta húsinu. Spennan er mikil og iðulega er bætt við einum þætti til viðbótar, allt þar til svefntíminn hefur orðið fyrir svo óafturkræfri skerðingu að næsti dagur verður með eindæmum erfiður. Það er líka enginn miskunn með að vakna á morgnanna. Hér á Framnesveginum er maður vakinn stundvíslega kl. 6:14 af lítilli rauðhærðri hnátu sem er alveg slétt sama um kosningabaráttu þá, sem persónurnar sem leiknar eru af Alan Alda og Jimmy Smits, há á kvöldin á sjónvarpsskjánum.

Athugasemdir

[Björn (IP-tala skráð) 20.2.2007 kl. 22:00]

Eftir að ég lauk við seríu 6 í síðustu viku hef ég náð að redda mér seríu 7.    

"redda" .......voðalega hljómar þetta eins og ólöglegt niðurhal af internetinu

[Magnús Már Guðmundsson, 20.2.2007 kl. 23:19]

West Wing eru hrikalega skemmtilegir þættir.

Ég var að hugsa um að panta mér nýjustu seríuna í gegnum Amazon. Þú mælir væntanlega með því.

Kveðja góð,

Paggi

[Jón Ingi Cæsarsson, 20.2.2007 kl. 23:23]

Ja hérna félagi...ekki deili ég þessum smekk með þér. Frekar flet ég mig út fyrir framan Animal Planet eða National Geographic

[Stefán Friðrik Stefánsson, 21.2.2007 kl. 00:34]

Heill og sæll

Sem mikill unnandi bandarískra stjórnmála er ég forfallinn áhugamaður um West Wing og horft á frá upphafi. Mjög góðir þættir og flott innsýn inn í kjarna bandarískra stjórnmála og líflegar pólitískar pælingar. Þetta er nauðsynlegt efni fyrir alla þá sem fylgjast með málum vestanhafs. Allavega eðalefni.

mbk.

[Bryndís Ísfold Hlöðversdóttir, 21.2.2007 kl. 00:37]

Ég á áttundu seríu - hvað býðurðu ?

[Haukur Nikulásson, 21.2.2007 kl. 08:58]

Elskurnar mínar. Passið ykkur á að opinbera ekki of mikið um il.. fengið myndefni!

[Höski (IP-tala skráð) 21.2.2007 kl. 11:53]

Unun mín á þessum þáttum er slík að ég vil helst ekki að fólk tali við mig nema a) ég sé labbandi og b) það hafi eitthvað hnyttið að segja. Ekki úr vegi ef menn hafa eitthvað fyrir mig að taka, kvitta á eða þvíumlíkt.  Þá fyrst er kátt í höllinni. 

Eina slæma við þennan þátt er það að framleiðslu þeirra hefur verið hætt.