Bleiki flokkurinn sýnir réttan lit

Nýr meirihluti í borgarstjórn Reykjavík fer ekki glæsilega af stað. Þrátt fyrir bleikar auglýsingar í aðdraganda kosninga er Sjálfstæðisflokkurinn auðvitað samur við sig að loknum kosningum. Þá er gamli góði íhaldsflokkurinn kominn í rétt klæði. Tal um jafnrétti kynjanna sýnir sig vera tal og ekkert annað. Ég get ekki sagt að þetta komi sérstaklega á óvart.
Ég held það hafi ekki farið framhjá mönnum að nokkur óánægja er meðal kvenna í Sjálfstæðisflokknum með rýran hlut þeirra við skipanir í ráð og nefndir á vegum borgarinnar. Stjórn Hvatar sendi frá sér ályktun þar sem hlutur kvenna við úthlutun í nefndarsetu og formennsku nefnda í borgarstjórn er harmaður. Konurnar vildu eðlilega sjá jafnari hlut og veikari staða kvenna birtist skýrt þegar litið er á formennsku og sæti í aðalstjórnum. Sjálfstæðismenn bera nú deilumál sín yfirleitt ekki á torg að óþörfu og ályktun Hvatar má því túlka sem megna óánægju með niðurstöðuna.
Aðalmenn meirihlutans í borgarráði, fagráðunum sjö, stjórn Orkuveitu Reykjavíkur og Faxaflóahafna eru 38. Þar af 10 konur eða 26% og hlutur karla því 74%. Formenn í þessum nefndum og ráðum eru 10 talsins. Þar af eru 2 konur eða 20% og karlarnir með 80%.
Borgarstjórinn virðist hins vegar telja að niðurstaðan sé mjög ásættanleg, eins og hann orðaði það. Ásættanleg fyrir hvern?