Hvað er það mikilvægasta í heiminum?

Stjórnmál eru skemmtilegur starfvettvangur. Það eru forréttindi að vinna við hugmyndir og með fólki. Það eru sömuleiðis forréttindi að geta unnið við áhugamál sitt eins og margir í stjórnmálum eru að gera. Það skiptir miklu máli að fólk hafi gaman að vinnunni sinni, þó það væri ekki nema vegna þess að fólk ver svo stórum hluta lífs síns í vinnunni.

Eitt sinn spurði mig spakur maður hvað ég teldi að væri það mikilvægasta sem sérhver maður á. Mitt fyrsta svar var heilsan. Þá svaraði þessi íslenski vitringur að það væru til margir einstaklingar sem væru gjörsamlega heilsulausir en lifðu samt gjöfulu og frjóu lífi.

Mitt næsta svar var að fjölskyldan hlyti að vera það mikilvægasta. En þá benti þessi vitri maður mér á að það væru fjölmargir einstaklingar sem ættu enga fjölskyldu en væru að engu síður afar hamingjusamir.

Þá stóð ég á gati og kallaði eftir svarinu.

Þá sagði hann mér að það mikilvægasta sem nokkur einstaklingur á sé tíminn. Tíminn er takmarkaður og hann fæst aldrei aftur, tíminn er forsenda tilveru okkar og án hans væri ekkert hægt. Þetta fannst mér vera fullkomlega rökrétt. Þessi maður lagði síðan áherslu á að við ættum að virða tíma hvers annars. Við eigum ekki að taka tíma frá fólki að óþörfu.

Þetta fannst mér vera vel mælt orð. Þess vegna er fullkomlega rökrétt að krefjast þess að vinnan manns sé bæði skemmtileg og gefandi. Stór hluti af okkar takmörkuðustu auðlind, tímanum, fer í vinnuna. Þess vegna eru það forréttindi að fá að vinna við það sem maður hefur gaman að. Og um leið og vinnan verður leiðinleg þá á maður að hafa kjark og þor til að skipta um starfsvettvang. Og sem betur fer eru valmöguleikar fólks orðnir miklu fleiri og fjölbreytilegri en áður þekktist.

Það sem mér finnst einna skemmtilegast við það að vinna við stjórnmál er einmitt sú hugmyndavinna sem er á bak við starfið. Eins og allir stjórnmálamenn eflaust þá tel ég mig vera í pólitík vegna hugsjóna og hugmynda.

Það er þessi grundvallarspurning, sem sérhver stjórnmálamaður og í raun sérhver borgari þarf að spyrja sjálfan sig, um að hvernig við gerum samfélag okkar enn betra.

Athugasemdir

[Ása (IP-tala skráð) 8.11.2007 kl. 14:44]

Já - það er satt - mikilvægt að maður eyði sínum tíma sem best - með fjölskyldunni sinni - eða vinnunni sinni - þú ert í stöðu sem tekur á svo mörgu varðandi fólk - og hvaða möguleika það fólk á í framhaldi með að eyða sínum tíma - þarf það að eyða tímanum svo mikið í vinnunni að það eigi engan tíma fyrir fjölskylduna? Eða fær ekki læknishjálp svo tími þess fer í veikindi í staðinn fyrir vinnu eða fjölskyldu?
Stjórnmál er málaflokkur með margar hliðar!!

Annars er mér efst í huga núna vaxtahækkun bankanna og var einmitt að blogga um þann farveg sem þeir eru að reyna að draga okkur inní.
Vona að sem flestir skoði þær upplýsingar sem þar koma fram - til að fá fleiri hliðar á möguleika sína í fjármálum og fasteignakaupum.
Og þar getur þú lagt þitt af mörkum til velfarnaðar án þess að evran komi Ágúst!
Til dæmis með því að afnema stimpilgjöld og fleira.........

[Dísa Dóra, 8.11.2007 kl. 16:15]

Þetta er mjög svo góð viska hjá gamla manninum.  Það mikilvægasta sem við gerum tel ég einnig vera að lifa fyllilega í núin og framkvæma í núinu.  Fortíðin er aðeins fortíð og við getum henni ekki breytt - nema þá helst með því að nýta reynslu hennar til góðs í nútíðinni.  Framtíðina vitum við aldrei hvort við höfum þó við gerum ráð fyrir því.  Því er það svo mikilvægt að lifa í núinu.

Því miður eru margir sem gleyma núinu vegna til dæmis drauma um hvað þeir ætli að gera í framtíðinni.  Geta ekki gert hitt og þetta fyrr en ehv annað er komið sem kemur í framtíðinni (gerir viðkomandi ráð fyrir).  Ef maður lifir þannig missir maður í raun af lífinu.

[Guðrún Magnea Helgadóttir, 9.11.2007 kl. 19:06]

Sæll Ágúst Ólafur. Á morgun klukkan 2 verður fundur hjá nokkrum einstaklingum sem vilja uppskera íslenskt réttarkerfi, á Kaffi Paris. Við væntum að þú viljir koma og hlusta á okkur og taka þátt í umræðunum... Við bjóðum upp á kaffi að sjálfsögðu